ازاي تبيع موبايلك المستعمل
بعد ما تعرف سعر موبايلك في السوق، باقي حاجتين: إعلان يخلي الناس تكلمك، وتسليم يعدي من غير مشاكل.
الصور
- صوّر بنور النهار، على خلفية سادة
- ٤ صور على الأقل: قدام، ورا، الجناب، والشاشة وهي شغالة
- صوّر شاشة صحة البطارية، ده بيوفر عليك عشر رسايل
- صوّر أي خدش أو عيب بوضوح. إخفاؤه مش بيوفرلك حاجة، بس بيخليك تروح المقابلة وترجع من غير بيع
- لو العلبة والشاحن معاك، حطهم في صورة
الوصف
اكتب من الأول: الموديل، السعة، صحة البطارية، الحالة، وجود العلبة والشاحن، والضمان لو موجود. حط الموديل والسعة في العنوان نفسه عشان الناس تلاقيك في البحث.
اكتب سبب البيع. سطر واحد زي «غيرت لموبايل أحدث» بيطمّن المشتري أكتر ما انت متخيل.
الفصال
- حدد لنفسك أقل سعر تقبله قبل ما حد يكلمك، والتزم بيه
- لو حد فاصل بمبلغ كبير من أول رسالة، غالبًا مش مشتري جاد
- خلي الكلام كله جوه التطبيق. لو حد بيحاول ياخدك بره من أول رسالة، خد بالك
قبل التسليم: امسح بياناتك
دي الخطوة اللي ناس كتير بتنساها.
- اعمل نسخة احتياطية من صورك وبياناتك
- اخرج من حسابك على كل التطبيقات، وخصوصًا الحساب الأساسي (Apple ID أو Google)
- اعمل Reset كامل للمصنع
- شيل شريحتك وكارت الميموري
- لو ايفون: اتأكد إن Find My اتقفل، وإن الموبايل اتشال من حسابك. من غير ده المشتري مش هيقدر يستخدمه أصلًا
المقابلة
قابل في مكان عام من أماكن المقابلة الآمنة الموجودة في التطبيق. سيب المشتري يجرب الموبايل على راحته: الكاميرا، السماعة، المايك، الشحن، البصمة. عد الفلوس قبل ما تمشي.
أسئلة شائعة
أعمل الريسيت قبل ولا بعد المقابلة؟
قبل. سيب الموبايل على شاشة البداية عشان المشتري يجربه من غير ما يوصل لبياناتك.
المشتري عايز يجرب الموبايل بشريحته؟
عادي وطبيعي، وده من حقه. بس في المكان العام، مش إنه ياخده ويمشي.
أستنى قد إيه لحد ما يتباع؟
لو عدى أسبوعين من غير اهتمام، راجع السعر مش الإعلان.
Swap for Digital Platforms @ 2026 All Rights Reserved